“شيرين” تخرج عن صمتها وتوضح ماجرى معها
خاص _ أضواء المدينة:
شاركت النجمة المصرية “شيرين عبد الوهاب”جمهورها ومحبيها عبر حساباتها الرسمية على منصات التواصل الاجتماعي، رسالة توجهت من خلالها لأهل مصر، موضحة من خلالها كل ما جرى معها خلال الأيام الماضية، والذي سبب لها أزمة كبيرة وصلت لتحويلها إلى التحقيق وإيقاف نقابة المهن الموسيقية لها عن الغناء.
وقالت شيرين: “عاوزة أتكلم من قلبي مع كل واحد من أهل بلدي الحبيبة، ومن أهلي وأصدقائي وزملائي؛ اللي قدروا يفهموا ويصدقوا إني لا يمكن أسيء لبلادي اللي أنا كلي من خيرها ولا يمكن أنكر فضلها عليا، بجد باشكركم وباحبكم، وبعتذر للي أساء فهم كلامي من كل قلبي”.
وتابعت: “بالنسبة للقنوات المأجورة من خارج مصر، اللي خدت كلامي وخرجته عن سياقه تماماً وحاولت تستغله ضد بلدي؛ بقولهم إن بلدي خط أحمر، وعمركم ما هاتفرقوا بيني وبينها”.
وأضافت: “أحب أوضح لكل الناس اللي حقهم يعرفوا إن ما كُتب عني في الصحافة ونُسب لي غير صحيح بالمرة، وتقدروا تتحقوا من صحة كلامي من الفيديو الموجود مع أنه ممنتچ عن قصد علشان يطلعني غلطانة”.
وأوضحت: “ما قيل على لسان النقابة والصحافة إني قلت: “أنا هنا أتكلم براحتي عشان اللي بيتكلم في مصر بيتحبس”، وطبعاً ده مش حقيقي، وماقلتهوش، لأن الكلمة بتفرق! اللي قلته نصاً وهو موجود بالفيديو: “أنا هنا أتكلم براحتي عشان في مصر ممكن يسجنوني” – فيه فرق كبير بين الجملتين!”.
وأنهت حديثها، قائلة: “أنا كنت بتكلم عن موقف شخصي لما هزرت على المسرح من قبل ورُفعت عليا دعاوى وصدر حكم بسجني سنة وسددت كفالة، واستأنفت واتلغى الحكم في الاستئناف! وبعدين اترفع عليا جنحة مباشرة عن نفس الواقعة، واتحكم فيها بعدم اختصاص القضاء المصري بما وقع في الشارقة؛ هذا ما كنت أقصده والله أعلم بالنوايا بحبك يا بلدي مهما حصل، ودايماً #تحيا_مصر”.
