اخبار الفن

محمد ممدوح يوجه رسالة بشان فيروس كورونا ويشارك بتقاطع طرق في رمضان

القاهرة – أحمد الدسوقي

حرص الفنان محمد ممدوح الساعات الماضية على توعية الجمهور ضد فيروس كورونا العالمي من خلال رسالة قام بنشرها عبر حسابه الرسمي لاخذ بعض الاحتياطات الاحترازية ضده قائلا ” الموضوع دلوقتي مابقاش حكومة ولا سياسة ولا منظمات.. الموضوع كله في ايدك انت كشخص.. انت مسئول بشكل كامل عن سلامتك وسلامة كل اللي حواليك”
واضاف “الأزمة اللي احنا بنمر بيها في العالم كله دلوقتي مش بتفرق ما بين فنان ولاعب كورة ورئيس وشخص عادي.. كلنا علينا نفس الواجبات والمسئوليات تجاه نفسنا والناس اللي حوالينا وتجاه بلدنا في الأخركنتيجة”.

وتابع ” النضافة الشخصية: كل الدكاترة والعلماء دلوقتي أجمعوا ان ابسط سُبل الوقاية من المرض ده دلوقتي هي انك تغسل إيدك بإستمرار.. سهلة جدا صح. ومانحطش ايدينا على وشنا اطلاقا طول ما احنا بره البيت او ايدينا مش مغسولة كويس جدا”.

واشار ” خلي معاك بخاخة مطهر كحولي في شنطتك.. طهر بيها إيديك لو بتركب مواصلات او بتعامل مع ناس كتير في شغلك.

ثانيا الإختلاط: ياريت يا جماعة نمنع الإختلاط اصلا بشكل مؤقت لحد ما الأزمة دي تعدي.. بإستثناء الشغل طبعا.. روح الشغل بس حافظ على نفسك بالخطوة اللي فوق.
يعني الناس تقلل الخروجات والقهاوي تماما.. تمنع اي نزول من البيت لغير الضرورة فقط.. معلش استحمل شوية لحد ما الموجة دي تعدي ونرجع أحسن من الأول.
وتابع ايضا ” قاوم جشع التجار والصيدليات اللي معندهاش ضمير ، لو روحت صيدلية ولقيته بيعرض عليك سعر للحاجة غير اللي انت عارفه ماتشتريش أبدا وهدده انك هتتصل بحماية المستهلك وهتعمله مشكلة.. لو كل واحد فينا عمل كدا ماحدش هيقدر يستغلنا.

” رابعا والأهم: بلاش يا جماعة نسبب أزمة في الاحتياجات الأساسية يعني انت مش مضطر تنزل تشتري كل المنتجات اللي في السوبر ماركت وتسبب أزمة في السوق وتمنع غيرك انه يشتري احتياجاته.. اشتري اللي بتشتريه في الطبيعي عادي جدا.. قولنا فوق مش هننزل غير للضرورة.. الضرورة دي من ضمنها تشتري حاجات البيت (وانتي مخلي بالك من نفسك وملتزم بإجراءات الوقاية”.

فامالهاش لازمة تروح تشتري كل الحاجات اللي في السوبر ماركت.. لو انت وغيرك عملتوا كدا هتسببوا تلقائي في خلق أزمة عامة في الاحتياجات الأساسية وبالتالي هترفع أسعار المنتجات بناءا على زيادة الطلب عليها.. فابلاش خالص.

خامسا: ماتسمعش وماتنشرش أي أرقام او اشاعات من اي مصدر غير رسمي.. خلي مصدرك الوحيد هو موقع منظمة الصحة العالمية وموقع وزارة الصحة المصرية.. ماتساهمش بإيدك في خلق موجة وهمية من الزعر والخوف.

واختتم ممدوح قائلا ” في الأخر احنا بنعمل كدا ليه. لأن زي ماقولنا دي مسئوليتك تجاه نفسك وأهلك وكل حبايبك وفي الأخر بلدك.. لأن انت لو اتعديت لقدر الله مش هتكون بتأذي نفسك بس، انت هتأذي كل دول ربنا يخرجنا من الأزمة دي على خير”.

من ناحية اخرى انتهى محمد ممدوح من تصوير مشاهد عديدة الفترة السابقة من مسلسله الجديد ” تقاطع طرق” الذي يخوض به السباق الرمضاني القادم ويشارك في بطولته مع الفنانة منى زكي .

اظهر المزيد

مقالات ذات صلة

زر الذهاب إلى الأعلى